الخميس، 20 مايو 2010

امسك حرامي


في يوم من ذوات الايام وانا ماشية ولا بيا ولا عليا كنت سرحانة في اسامة(اسامه ده مستر الكيميا)اوعوا تفهموا غلط!!
المهم كان فيه شوية ناس واقفة كدا في مجموعة واحدة من بعيد ومعرفش شافوا ايه يا اخويا فجأة لاقيتهم كده كلهم مرة واحدة بيجروا عليا!! طبعا انتوا عارفين في المواقف دي بيكون ايه اللي حاصل؟ انا بقى افتكرت نفسي في فيلم ابيض واسودوالشهامة اخدتني واذا بيا امارس رياضتي المفضلة الا وهيا الجري
بس الجري المرة دي ماكنش عادي حيث خيلت لي نفسي ان فيه حرامي والرجالة الشهمة دي كلها بتجري ورااااه
الله عليكي يا مصر!لسه فيكي رجاله حقيقية بجد1!
وانا طبعا اما صدقت وغيرت اتجاه مسيرتي وقعدت اجري معاهم..
المهم فجأه كده مرة واحدة لاقتهم كلهم سابوني!
ايه يا رجاله انا كنت بشكر فيكم من سطرين!
المهم لاقيتهم كده كلهم مرة واحدة انقضوا على شيْ ما متحرك لم ادرك ماهية هذا الشيْ بسبب انقضاض الناس عليه!
والمهم وبعد ان تبينت ملامح هذا الشيْ بعض الشيء عرفت انه اتوبيس!!
انا عمري ما شوفت خناقة ع اتوبيس بالطريقة دي.وده بيشد ف ده ودي بتضرب ده وده بيترمي بره وايادي تتشابك ورجلين بتشنكل.
بس الاتوبيس الظالم لم يترك لهم سوى دقيقتن وبعد كده مشي وخاب امل البعض منهم الذي لم يلحق بهذا الركب العظيم!
ظاهرة غريبة فعلا! فأنا عمري ما شوفت هذا الزحام الشديد سوى على حفلات هيفا ونانسي!او حول سيارة يدعي البعض انها تخص تامر..
وينضم لهذه القائمه(اتوبيس حوله عدد من المواطنين يتمنون نيل الشرف والدخولجواه)
بعد مأساة عظيمة انا حاسة ان اللي بيدخل الاتوبيس وده وبينجح انه يقتحم هذا الحشد يجب انا ينال وسام الشجاعه.اما من لا يالفه الحظ فحظ سعيد المرة القادمة..
المهم فكر معايا كده لو كان فيه اتوبيسات اكتر كان هيحصل اللي بنشوفه ده؟
لو الدولة وفرت لنا اتوبيسات مكناش هنشوف حاجة زي دي..
بس الاهم لو الناس دي اتعلمت الاحترام وعدم الاحتشاد كنا هنشوف المهازل دي؟
اترك هذا الموضوع مؤقتا لاني دلوقتي في المستشفى اعاني من امراض الدنيا كلها بعد الضرب والبهدلة التي شاهدتها ف رحلة الجري ورا الحرامي...قصدي الجري ورا الاتوبيس
ملحوظة:اي حد يلاقي نضارة ضايعه او شنطة او اي متعلقات شخصية يتكلم ع النمرة دي0100000000
لان انا فقدت كل حاجاتي اثناء رحتي ايضا في محاولة ركوب اتوبيس



الاثنين، 15 فبراير 2010

مافيش حاجة للصالح...كله بتاع مصالح


_عفوا ...اعذروني مش عاوزة حد يعلق ويقوا العنوان ده فيه جناس لاني مليت من الكلمة دي ياعتباري من(ضحايا الثانوية العامة)....

وعفوا ايضا لأني دخلت فيكم شمال وبقيت اتكلم بالفصحى شوية....سيبونا من الاعذار وتعالوا نتكلم في موضوع مهم جدا وياما اتكلمنه فيه بس مافيش فايدة...

أول ما تدخل من مطار القاهرة كده وانت داخل يمين تشم ريحة غريبة جدا في جو مصر مش موجودة في اي حته غير ف ام الدنيا!

وهيا ريحة_(واسطة وكارت من الباشا وتحت الترابيزة)!

واول ماتشم الريحة دي تأكد واعلم علم اليقين يبقى انت اكيد اكيد في مصر...تيرارارار.

كل شبر ف بلدنا بقى ماشي بالوسطة للدرجة بانها بقت سمة مميزة لبلدنا..

كل حاجة في حياتنا واسطة في واسطة....

بعد كده ف الالفية الجية هتلاقي اما الست تروح تولد الدكنور يقولها سوري يا مدام عشان اضمن ان ابنك يعرف يعيش بعد كده وريني الواسطة بتاعته اللي هيعرف بيها يتعايش مع اهله انما لو مش معاه (ايم بوسيبل)نو نيفر اطلاقا مش هخرجه للحياه....

أما تلاقي نفسك كده وانت ماشي ف الشارع وخبطتك عربية ماتستغربش!!!

أصل سوزي مطلعه الرخطة بالواسطة...

وأما تروح عند دكتور عشان يعمل لك عملية ولا حاجة وصحيت لاقيت نفسي ف مكان خير اللهم اجعله خير اسود ف اسود وحوليك ميتين وبتتحاسب برضه ماتستغربش...!!

أصل د_شلبي دخل كلية الطب بمجموع 49 ف المية من الثانوية العامة وكله بفضل فلوس بابي ومامي وكارت اونكل هشام...

وبرضه لو وقعت عمارتك بعد 2 شهر من بنائها برضه ماتستغربش...!!

اصل الباش مهمندس كوكي برضه دخل هندسة بمجموع 39 ف المية,

تعالوا نعمل تجربه كده وهنشوفها هتفلح ولا لأ...

التجربة: روح بيع مخدرات وتاجر فيها(اصلها بتكسب دهب)وخليهم يقبضوا عليك وروح ادي للظابط اللي مسكك 2000 جنيه ولا حاجة ف ايده(وماتبقاش بخيل ما انت بتكسب اد كده)

المشاهدة: زغلله ف عين الشرطي وعصير ليمون لحضرتك تهدي بيه اعصابك اللي اتوترت وانت داخل القسموعربية هتوصلك لحد باب البيت.

الاستنتاج:1_مصر بلد الامن والامان.

2_اي حد عاوز يبيع مخدرات ينورنا ف مصر.

3_ارتفاع معدل تجارة المخدرات ف مصر.

بس معلش يا جماعه المصلحة دي ع بال ماتنقضي لازم باباك يبقى لواء او اي حد من الناس دول اللي بيلبسوا لون الكرافته زي لون الحزام...


هااااااااااااااي انت..ايوه انت...ايوه انت يا احول.امال بشاور ع مين يعني!!..عاوز تغني...وصوتك وحش...تعالى عندي...الحل ف ايدي..هديك كارت من وزير الثقافةتروح بيه عند نصر محروس وف خلال يومين هتلاقي كليبك مكسر الدنيا...بس كله بحسابه واسأل مجرب..والعرض ساري حتى نفاذ الكمية...

وبالرشوة والواسطة احنا قادرين نعيش ونتعايش مع حياتنا وحامدين ربنا ع كل حال...

بسالحقيقة انا شايفة المكان الوحيد اللي مافيهوش ف مصر واسطة هو مكتب التنسيق...

لان ده المكان الوحيد اللي كل الشعب المصر يتمنى يبقى فيه رشوة وواسطة...!!

وفي الاخر لو اتاخد حقك واتظلمت ع حساب حد تاني...ماتستغربش!!

انت ف مصر...

الخميس، 4 فبراير 2010

أنا ابويا وزير وانت...؟


بنقاب كتير ف حياتنا حاجات ومواقف غريبة ومستفزة فعلا..واللي يعيش يااما يشوف وبما انتي عشت من مايقرب من 17 سنة فأنا شوفت حاجات كتيرة مستفزةفعلا...
وهيا انك تلاقي واد من اللي بيحطوه جيل دول والبنات اللي لابسالك ينطلون ضيق ونكشالك شعرها وتيجي مثلا تتكلم معاهم ف اي حاجة وهيا ابوها مش عارف يبقى ايه وماتها تبقى مين وابن جوز عمة خالتها يطلع مين.
الانواع دي من الناس اما بتيجي تتكلم من معاهم بيبقى كلامهم واحد...
بيبدأ الحوار ازاي
_ممكن نتعرف انتي اسمك ايه؟. _انا اسمي صافي وبابي رئيس مجلس الهيئة الدولية للزبالين. _(يا حلاوة ياولاد حلو الاسم الجديد المركب ده) ماعلينا يا اوختي.الله شعرك حلو اوووي بتستخدمي كريم ايه؟ _انا بستحدم (خمس عشرينات؟)للشعر الجاف ومامي رئيسة حي. _اشطة هو اسم الكريم كمان مركب..الله عليكي كده يا اوختي وانتي بتقوليها..

وبما ان ليها قرايب مهمين فهيا بتعمل اللي هيا عاوزاها وبراحتها
مثلا تلاقي حد راكب عربية ووهو سايق ومشغلي تامر الجديد ومنمدج ولابسلي نضارة الشمس وراح تيييييييييييييش دخل ف طفل موته.
ويروح القسم واول ما ظابط الشرطة يشوفه بيبقى الحوار الاتي:
الشرطي اول ما يشوفه:سيادة اللواء وانا بقول القسم منور ليه؟ اتفضل اتفضل يا باشا اقعد ع مكتبي.
اللواء:ميرسي ليك.
الشرطي:فيه حاجة يا باشا خير فيه ايه؟
اللواء:لا ابدا جت بسيطة موت الواد ده.يالا خلصني وشوف لي صرفة احسن اتأخر ع ميعاد البارتي.
الشرطي:اوامرك يا باشا.ثم يتجه الشرطة ع جثة الطفل الميت..
انت يا واد ايه اللي موتك ده انت ليلتك سودا النهاردة مالقتش غير عربية الباشا واقع قدامها
طااااااااااااااخ اما واد خرع صحيح. ولا يهمك يا باشا.
وراح طلع ورقة وكتب عليها:لم يستدل ع جثته...
وينتهي الموقف ب خمسيناية ف ايد الشرطي ويذهب اللواء للبارتي بتاعته ولا كان اي حاجة حصلت...
أكيد احنا بنشوف المواقف دي ف حياتنا كتير وف راي ان المواقف دي هنفضل نشوفها طول عمرنا لا الانسان عمره ماهيبطل يتباهى بحسبه ونسبه(وتلاقي هو اساسا ساقط 4 ابتدائي) وعمر ما الانسان هيبطل يخاف من الاكبر منه منزلة!
ربنا يرحمنا جميعا
وها بقى انا ابويا وزير واللي مش عيدخلني كلية حلوة بعد الثانوية العامة والله والله لاقول لبابي عليكوا..!


صباح الخير يا معالي الوزير...






بصوا بقى وصحصحوا معايا كده.اللي قاعد ع جنبه يتعدل واللي مقفل عينيه يفتحها واللي مشغل اغاني يعمل ستوب شوية.

ها!خلاص...

بصوا بقى يا حضرات من فترة كده سمعنا ان سيادة معالي رئيس الوزراء جاي يفتح كوبري كده ع اول الشارع بتاعنا المهم(طبعا انا فرحت عشان هشوف نظيف اصله طويل اوي وانا بحب الطوال)

لا لا ركزوا بقى.

المهم...ع مدى 200 كم من الشارع اللي فيه الكوبري بحركة غريبة كده..بصوا بقى الشوارع دي كانت منتجع للزبالة ومافيهاش شجرة واحدة وكان فيه اشارة كده انما ايه!اشارة زي الفل اللي ماوريهوش حاجة يروح يقف فيها .ممكن تقف فيها نص ساعة. ده بلاس(معلش اصل لغتي الام انجلش)

ان البيوت كان شكلها عامل زي اللهم احفظنا!ماكنتش تقريبا عمارات كانت عمارات سوداااااا(يمكن الحي بيحب اللون الاسود)...

أظن نظريتي وصلت اصل مش قادرة اوصفهم.

المهم لاقينا حركة غريبة كجه ف الشارع وال ايه خير اللهم اجعله خير.ايشي(مش قولت ان لغتي الام انجلش)ايشي شجر وايشي العمارات ابتدت تدهن والشوارع بقت نظيفة واتسفلتت وسور جميل اوي.

والاشارة اياها بقت اشارة الكترونية والناس بتروح تتصور عندها(معلش يا جماعه اعذروهم اصلهم افتكروها مسلة بتنور وبتعد تنازلي)

وكمان بقى فيه علامات (نو باركينج) يا حلاوة يا ولاد انا اول مرة اشوفها..

بس الاغرب فعلا ان الناس مازالت سايبة الشارع كله فاضي وبتروح تركن عند العلامة دي!!

المهم بعد ما الشارع بقى قطعه من اوروبا,وجيه معالي الوزيرولاقيت اعلام مصر محطوطة ع كل شبر ف الشارع...الله شارعنا بقى حلو اوووي!

وجيه سيادة رئيس الوزراء وشكر رؤؤساء الحي ع المجهود العظيم اللي عملوه!

بس حقيقي كان نفسي اقولكم ايه اللي حصل بعد ما الوزير ما مشي.

بس اكيد متوقع ايه اللي حصل!

بس اوعدكم بجد اما انزل الشارع هبقى اقولكم ايه اللي حصل.

وصباح الخير يا معالي الوزير!



الخميس، 28 يناير 2010

عيون مصر الساهرة وسمعني احلى سلام لعمو طارق...

طبعا العنوان باين من جوابه أأأقصدي الجواب باين من عنوانه...طبعا هتقولولي جواب ايه وعنوان ايه. قصدي يعني(عيون مصر الساهرة) اول ماشوفتوها عرفتوا انا هتكلم عن ايه؟بس مالكوش دعوة بعمو طارق ده تبعي انا...عيون مصر الساهرة دي يارحاله كناية عن رجال الشرطة.اينعم هما بعينهم بحلاوتهم؛طبعا اليوم الموافق 25_1 يوم عظيم يوم مريب يوم رائع ده اليوم اللي فازت فيه مصر ع الجزائر يوووووووه نستوني بقى

استنوا اكتب من الاول (اصلي اندمجت والحماسة اخدتني)

كلاكيت تاني مرة

ده يبقى يوم عيد الشرطة هيييييييييييييييييييه بوووووومب

كل واحد منا بيسمع كلمة(رجل شرطة)بيفتكر ان البدلة البيضا ف الشتا والسودا ف الصيف(زي ما الافلام بتغلط وبتعمل كده) ماعلينا مش هنضيع كلامنا ف البدل والشرابات

نتكلم عن لٌب الموضوع(لب ابيض ولب اسمر)بس بقى مش عاوزين نخرج عن الموضوع...

رجال الشرطة بتتمثل اهميتهم ف حاجات كتيرة فمثلا سيادتك اما بتبقى نايملي ف البيت ومخمود وهما ياعيني واقفين بيحرسوا حضرتك

رجال الشرطة دول اللي كان فيهم كتير اوي من الشباب اللي كانوا واقفين ع الحدود وبيحرسوا مصر وماتوووا...

تخيل كده حياتك من غير رجل الشرطة (عارفة يا صغننين انتوا فكرتوا ف ايه! أكيد قولتوا مش هنلاقي حد يدينا الاصطباحة يعني مش هنلاقي حد يدينا بالأفا)

لا ده مش قصدي لو مافيش رجال الشرطة سيادتك هتبقى ماشي ف الشارع ومش هتلاقي حد يحميك ولا يحمي الموزة بتاعتك...

ف رأي رجال الشرطة دول عصب الامة وياعيني مظلومين اصل بيقولولك ان الشرطة ف خدمة الشعب طب هما مين ف خدمتهم

تحياتي لكل رجل شرطي وشمعني احلى سلام لعمو طارق

وطبعا عاوزين تعرفوا مين عمو طارق هقولكم مالكوش دعوة وانتوا مالكم!

سؤال الحلقة:

مين عمو طارق؟

1_وانا مالي.

2_وانا ايش عرفني.

3_انا مش فضولي ومش عاوز اعرف.

لو عرفت الاجابة اتصل بينا ع 0500 وادي دقني لو حد كسب


من حقنا....


انا مش هقول كلام فاضي....هقول كلام معقول ما اقدرش اقول حاجة عنه تي رارارا ....ركز هنا بقى

انا طلباتي مش كتيرة...انا طلباتي هادفة....طلباتي هتفيد حوالي تلتين شباب مصر

انا مش هطالب بتزويد الكادر...ولا هطالب باعادة ماتش مصر والجزائر....ولا هصرخ بأعلى صوتي واقول كفاية يا حسني حرام (حسني ده جارنا اوعوا دماغكوا تروح بعيد)

انا طلبي ابسط من كده بكتيير ...انا طالبة اسبوع اجازة!

لله يا محسنين لله اسبوع اجازة يمنع بلاوي كتيييرة

اسبوع يا ولاد الحلال لطلبة الثانوية العامة

وهنيالك يا فاعل الخير

حرام عليكوا تعبنا.عاوزين اسبوع واحد بس

ياااااااااااااااه

نفسي كده اقعد ادام التليفزيون وانام ع ضهري واجيب حاجة غير القنوات التعليمية

نفسي اقعد قدام الكمبيوتر واجيب حاجة غير الغرف الصوتية

نفسي اقابل اصحابي وماسألهمش ذاكرتوا ايه النهاردة

نفسي ونفسي ونفسي اهيْ اهيْ اهيء(عيطوا معايا يمكن اما نعيط نصعب عليهم)

ومن موقعي هذا انا شد كل طلبة الثانوية العامة واقولهم يالا نعمل مظاهرة ع كل المدرسين المفتريين

وليكن شعارنا

من حقنا من حقنا نحلم بحضن يضمنا.....

أأأأقصدي

من حقنا من حقنا نحلم باجازة تضمنا

سؤال الحلقة:

ماذا تعرف عن مدرسين الكيميا وخاصة اللي ف بالي؟

1_شريرين.

2_مفتريين.

3_تييييييييييييييت(حذف من قبل الرقابة)

واللي يعرف الاجابة يتصل ب 0500 والجايزة هيا مدرس كيميا هدية

الثلاثاء، 26 يناير 2010

حياتي عذااااب!!


حاسة انه اسم كتاب أو فيلم..

هوا غالباً على وزن حماتي ملاك بس انا متهيألي حماتي هتبقى مقطقطة كده وكول ع الاخر..

بس ديه مش مشكلتنا إيه الرغي ده كله ده الستات دول رغايين اوي(على اعتبار اننا مش منهم (^_^)



اليوم اصدرت قرار داخلي جواني بأنني انسانة ليا حقوق وعليا واجبات ولأني في سن خطر وممكن أشم كلا(بضم الكاف وشد اللام) او افتح المدونة على غرزة..يعني قمة الانحراف لفتاة في السادسة عشر من عمرها فأنا بطالب بابسط حقوقي وهيا..اجازة لمدة اسبوع....Pleaaaaaase I beg you I beg you

اهيء اهيء عاااااااااااااا(وش بيعيط)

:((((((



لقد اصدر الاساتذة المسترات المبجلين فرمانهم باعدامنا حرقاً قصدي مذاكرتاً(عشان القافية)

وقرروا اعلان الحرب على الطلاب المطحونين والمجبورين وإلغاء الاجازة الترمية وهي حصة واحدة فقط

لله حصة زكاة عن صحتك وصحة عيااااالك

مش عاوزين غير اسبوع ارجووووووكن (وش بيعيط بس غير الوش اللي فوق)



وأنا من موقفي هذا أناشد المسئولين السيد وزير الكهربا والسيد وزير المياه بمنطقة شمال القاهرة ان يقطع النور والمياه عن كل مدرس مفتري مش هيدي بتوع ثانوي اجازة :(

وبهذه المهزلة اعزائي اضيف إلى كارثة السيول والبرد ومنكوبي الزلازل وأطفال الشوارع...متشردين الثانوية العامة

وبمناسبة الاجازة بتاعت نص السنة..احب اقول...حسبي الله ونعم الوكيل


(وش بينتحر)