الخميس، 20 مايو 2010

امسك حرامي


في يوم من ذوات الايام وانا ماشية ولا بيا ولا عليا كنت سرحانة في اسامة(اسامه ده مستر الكيميا)اوعوا تفهموا غلط!!
المهم كان فيه شوية ناس واقفة كدا في مجموعة واحدة من بعيد ومعرفش شافوا ايه يا اخويا فجأة لاقيتهم كده كلهم مرة واحدة بيجروا عليا!! طبعا انتوا عارفين في المواقف دي بيكون ايه اللي حاصل؟ انا بقى افتكرت نفسي في فيلم ابيض واسودوالشهامة اخدتني واذا بيا امارس رياضتي المفضلة الا وهيا الجري
بس الجري المرة دي ماكنش عادي حيث خيلت لي نفسي ان فيه حرامي والرجالة الشهمة دي كلها بتجري ورااااه
الله عليكي يا مصر!لسه فيكي رجاله حقيقية بجد1!
وانا طبعا اما صدقت وغيرت اتجاه مسيرتي وقعدت اجري معاهم..
المهم فجأه كده مرة واحدة لاقتهم كلهم سابوني!
ايه يا رجاله انا كنت بشكر فيكم من سطرين!
المهم لاقيتهم كده كلهم مرة واحدة انقضوا على شيْ ما متحرك لم ادرك ماهية هذا الشيْ بسبب انقضاض الناس عليه!
والمهم وبعد ان تبينت ملامح هذا الشيْ بعض الشيء عرفت انه اتوبيس!!
انا عمري ما شوفت خناقة ع اتوبيس بالطريقة دي.وده بيشد ف ده ودي بتضرب ده وده بيترمي بره وايادي تتشابك ورجلين بتشنكل.
بس الاتوبيس الظالم لم يترك لهم سوى دقيقتن وبعد كده مشي وخاب امل البعض منهم الذي لم يلحق بهذا الركب العظيم!
ظاهرة غريبة فعلا! فأنا عمري ما شوفت هذا الزحام الشديد سوى على حفلات هيفا ونانسي!او حول سيارة يدعي البعض انها تخص تامر..
وينضم لهذه القائمه(اتوبيس حوله عدد من المواطنين يتمنون نيل الشرف والدخولجواه)
بعد مأساة عظيمة انا حاسة ان اللي بيدخل الاتوبيس وده وبينجح انه يقتحم هذا الحشد يجب انا ينال وسام الشجاعه.اما من لا يالفه الحظ فحظ سعيد المرة القادمة..
المهم فكر معايا كده لو كان فيه اتوبيسات اكتر كان هيحصل اللي بنشوفه ده؟
لو الدولة وفرت لنا اتوبيسات مكناش هنشوف حاجة زي دي..
بس الاهم لو الناس دي اتعلمت الاحترام وعدم الاحتشاد كنا هنشوف المهازل دي؟
اترك هذا الموضوع مؤقتا لاني دلوقتي في المستشفى اعاني من امراض الدنيا كلها بعد الضرب والبهدلة التي شاهدتها ف رحلة الجري ورا الحرامي...قصدي الجري ورا الاتوبيس
ملحوظة:اي حد يلاقي نضارة ضايعه او شنطة او اي متعلقات شخصية يتكلم ع النمرة دي0100000000
لان انا فقدت كل حاجاتي اثناء رحتي ايضا في محاولة ركوب اتوبيس



هناك 10 تعليقات:

  1. ههههههههههههههههههههه

    انتي فقر يابنت

    روحي ذاكرررررررررري

    انتي ثانوية عامة

    سيبك من الجري ورا الاوتوبيسات وفكري ف اوسامة احسن :D

    ردحذف
  2. هههههههههههه
    ماهي دي زي ما بيقولوا تخاريف الثانوية العامة
    ميرسي ليكي جدا يا اعقل مجنونة

    ردحذف
  3. ههههههههههههههههههههههههه

    والله حلو اوى يا بنتى الى بيركب اتوبيس دلوئتى ويلايئه فاضى بيفضل طول الليل يصلى شكر لربنا ويطلع صدقه بس انتى عامله ايه دلئتىى الدكتاره قالتلك ايه يا حبيبتى يا بنتى مرميه ف المستشفى اهىء اهىء اهىء
    كنا مع ضحيه اخرى من ضحاياي الثانويه العامه اصدى ضحايا الاتوبيس

    ردحذف
  4. هههههههه
    كان معاكم عفت الشربيني من قناة الجزيرة
    يااستاذ غير معرف ميرسي جدا لردك وميرسي لتعاطفك معايا

    ردحذف
  5. السلام عليكم
    ههههههههههههههه
    على فكرة الاتوبيس دة شكلة بيعدى على كلوا لانى بركب شبية لية
    هذة اول زيارة لى على هذة المدونة الرائعة

    ردحذف
  6. شكرا لردك يا جنى
    رافعتي معنوياتي

    ردحذف
  7. قلقي يا ألوأتي...انا عيني وجعتني والله

    كبري الخط ابوس ايديكي..كنت هكبره بس قولت لأ ده موضوعك انتي ولما الخط يتظبط هنشر مدونتك عندي :)

    فهماني طبعا

    ردحذف
  8. الموضوع كده احلى باي زا واي قريته برغم عيني اللي اشتكت قولت اعلق تاني يعني ارع من معنوياتك ^_^

    ردحذف
  9. ههههههههههههههه
    وانا بقى اول ماشوفت 8 كومنتات فرحت اوي اتاريكي انتي لوحدك كاتبة 2 كومنت
    اما اجيلك بقى هبقى اقولك نعمل ايه
    منوراني يا قمري

    ردحذف